ಒಂದೇ ಒಂದು ಕ್ಷಣ

ಒಂದೇ ಒಂದು ಕ್ಷಣ ನಿನ್ನ ಬದಿ 

ಕೂರಲನುಗ್ರಹಿಸು ಸ್ವಾಮಿ,

ನನ್ನ ಕೈಯೊಳಗಿನ ಕೆಲಸವನ್ನೆಲ್ಲ 

ಆಮೇಲೆ ಮುಗಿಸುವೆ

ನಿನ್ನ ಮುಖ ಮರೆಯಾದರದೋ, 

ನನ್ನೆದೆ ಡವಗುಟ್ಟುವುದು,

ದುಡಿಮೆಯದು ದಡಕಾಣದ ಕಡಲಲಿ 

ಮುಗಿಯದ ಜೀತವಾಗುವುದು,

ಇಂದೆನ್ನ ಕಿಟಕಿಯಲಿ ಬೇಸಿಗೆಯು ನುಸುಳಿದೆ 

ನಿಟ್ಟುಸಿರು ಗೊಣಗಾಟವನೊತ್ತು;

ಹೂದೋಟದಿ ದುಂಬಿಗಳು ಎಡಬಿಡದೆ ಕಿರುಲುತಿವೆ 

ಶೋಕಗೀತೆಯ ಸುತ್ತು.

ಇದುವೇ ತಕ್ಕ ಸಮಯ, ಈ ನೀರವದ 

ನಿಡಿದಾದ ಬಿಡುವಿನಲಿ,

ನಿನಗೆದುರುಬದುರಾಗಿ ಸುಮ್ಮನೆ ಕುಳಿತು, 

ಬದುಕಲು ಪಣತೊಡುವೆ.

(ರವೀಂದ್ರನಾಥ ಟ್ಯಾಗೋರರ ಗೀತಾಂಜಲಿಯಿಂದ

I ask for a moment's indulgence to sit by thy side 

ಪದ್ಯದ ಅನುವಾದ ಸಿ ಮರಿಜೋಸೆಫ್ ನವರಿಂದ)