ಮಾತು ಆಕಾರ ಮೌನ ನಿರಾಕಾರ

ಮಾತು ಆಕಾರ ಮೌನ ನಿರಾಕಾರ

ನಿರಾಕಾರದಿಂದ ಆಕಾರದೆಡೆಗೆ

ಸಾಕಾರವಾಗುತ್ತಾ ನಿರಾಕಾರವಾಗಲಿ

 ಮೌನ ನೀನು

ಮಾತುಗಳಲ್ಲೇ ಕಳೆದುಹೋಗಿರುವ ನಾನು

ಮೌನ ನಿನ್ನ ಸೇರಿ

“ಮಾತು” ನಾನು ಇಲ್ಲವಾಗಲಿ
--------

ನನ್ನ ನಿನ್ನ ಸಮಾಗಮ

ತುತ್ತಾಗದಿರಲಿ ಸ್ಪಷ್ಟೀಕರಿಸುವ ಮಾತಿನ ಗಾಣಕ್ಕೆ

ಬೀಳದಿರಲಿ ಅರ್ಥ ಮಾಡಿಕೊಳ್ಳಲು ಹೆಣಗುವ ವಿವೇಕದ ಗುಂಡಿಗೆ

ನಾನೆ  ನೀನಾಗಿ ನಾನು ಮಾಯವಾಗಿ

ನೀನು ಮಾತ್ರ ಕಾಣಲಿ
----------

ನಾ ಕತ್ತಲು

ಬೆಳಕು ನೀನು

ನನ್ನಲ್ಲಿಗೆ ಬಂದೊಡನೆ

ಕತ್ತಲು ನಾನು ಇಲ್ಲವಾಗಿ

ಬೆಳಕು ನೀನೊಂದೆ ರುಜುವಾಗಿಬಿಡಲಿ
----------

ಒಂದಲ್ಲ ನೂರು ಸಲ

ಕೊಟ್ಟ ಅವಕಾಶಗಳಿಗೆ ನಾನು

ಮುಚ್ಚಿ

ಬಾಗಿಲ ಹೊರಗಟ್ಟಿ

ಕೊನೆಗೆ

ಎಲ್ಲಾ ದಾರಿಗಳು

ನನಗೆ ಮುಚ್ಚಿಕೊಂಡಾಗ ಗೊತ್ತಾಗಿದ್ದು

ನಾನು

ಆಗಲೇ ಸಮುದ್ರ ಸೇರಿಬಿಟ್ಟ ನದಿಯೆಂದು. .

¨ ಜೀವಸೆಲೆ