ಏನೂ ಹೇಳುವುದಿಲ್ಲ. ಸುಮ್ನೆ ಕೇಳಿಸಿಕೊಳ್ಳುತ್ತಾರೆ

ಏನೂ ಹೇಳುವುದಿಲ್ಲ. ಸುಮ್ನೆ ಕೇಳಿಸಿಕೊಳ್ಳುತ್ತಾರೆ
ಪತ್ರಕರ್ತ: ನೀವು ಪ್ರಾರ್ಥನೆಗೆ ಕೂತಾಗ ದೇವರಿಗೆ ಏನು ಹೇಳುತ್ತೀರಿ?

ಸನ್ಯಾಸಿನಿ: ನಾನು ಏನೂ ಹೇಳುವುದಿಲ್ಲ, ಸುಮ್ನೆ ಕೇಳಿಸಿಕೊಳ್ಳುತ್ತೇನೆ.

ಪತ್ರಕರ್ತ: ಹಾಗಾದರೆ, ದೇವರು ನಿಮಗೆ ಏನು ಹೇಳ್ತಾರೆ?

ಸನ್ಯಾಸಿನಿ: ಏನೂ ಹೇಳುವುದಿಲ್ಲ. ಸುಮ್ನೆ ಕೇಳಿಸಿಕೊಳ್ಳುತ್ತಾರೆ.

ಹಾಗೇ ಸುಮ್ಮನೆ ..

ನೀವೂ ನಿಮ್ಮ ಕೋಣೆಯನ್ನು ಬಿಟ್ಟುಹೋಗಬೇಕಿಲ್ಲ. ಕುರ್ಚಿಯ ಮೇಲೆ ಕುಳಿತುಕೊಂಡೇ ಕೇಳಿಸಿಕೊಳ್ಳಿ. ಕೇಳಿಸಿಕೊಳ್ಳುವುದು ಬೇಡ, ಸುಮ್ನೆ ಕಾಯಿರಿ, ಸ್ತಬ್ಧವಾಗಿ ಎಕಾಂಗಿಯಾಗಿರಿ… ಜಗತ್ತೇ ನಿಮಗೆ ಅರ್ಪಿಸಿಕೊಳ್ಳುತ್ತಾ ಬಯಲಾಗಿಬಿಡುವುದು, ಅದು ಭಾವಪರವಶತೆಯಿಂದ ನಿಮ್ಮ ಕಾಲುಗಳ ಮೇಲೆ ಉರುಳಾಡುವುದು….


ಹೃದಯದಿಂದ ಸಹ ಕೇಳಬೇಕು

ಶಿಷ್ಯ: ಜಗತ್ತಿನ ವಾಸ್ತವವನ್ನು ತಿಳಿಯುವುದಾದರೂ ಹೇಗೆ? ಯಾವುದು ನಮ್ಮನ್ನು ಜಗದ ವಾಸ್ತವದಿಂದ ದೂರ ಮಾಡುತ್ತದೆ?

ಗುರುಗಳು: ಯಾವಾಗಲೂ ಪೂರ್ಣ ಹೃದಯದಿಂದ ಎರಡೂ ಕಡೆಗಳಿಂದಲೂ ಕೇಳು, ಆಗ ನಿನಗೆ ಜ್ಞಾನೋದಯವಾಗುವುದು… ಕೇವಲ ಒಂದೇ ಕಡೆಯಿಂದ ಕೇಳಿದರೆ ಅದು ನಿನ್ನನ್ನು ಕತ್ತಲೆಗೆ ದೂಡಿಬಿಡುವುದು…

ಆಲಿಸುವುದನ್ನು ಗುರುತಿಸಲು ಚೀನಿಯರು ಎರಡು ವಿಭಿನ್ನ ಚಿಹ್ನೆಗಳನ್ನು ಬಳಸುತ್ತಾರಂತೆ: ಒಂದು ಕಿವಿ ಮತ್ತೊಂದು ಹೃದಯ. ನಾವು ನಿಜವಾಗಿಯೂ ಆಲಿಸಲು ಕಿವಿಗಳನ್ನು ಮಾತ್ರ ಬಳಸಿದರೆ ಸಾಲದು … ಹೃದಯದಿಂದ ಸಹ ಕೇಳಬೇಕು.

¨ ಇನ್ನಾ