ಡಿಸೆಂಬರಲ್ಲವೆ ಈಗ?

ಡಿಸೆಂಬರಲ್ಲವೆ ಈಗ? 

ಇರುಳು ಚೆಲ್ಲಿದೆ ಹಾಲು ಬೆಳದಿಂಗಳಲ್ಲಿ 

ನಕ್ಷತ್ರಗಳ ಕೆಳಗೆ ಸಾಗುವಾಗ 

ಕಣ್ಣಿಗೆ ಬೀಳುವುದಿಲ್ಲವೆ 

ಬೆಳೆದ ಮರಗಳ ತುದಿಯ ಬೆಳ್ಳಿಯೆಲೆಗಳ ಮೇಲೆ 

ಗೋಪುರದಲ್ಲಿ ಶಿಲುಬೆ? 

ಕ್ರಿಸ್ಮಸ್ ರಾತ್ರಿಗಂತು ಇನ್ನಷ್ಟು ಚಳಿ ಬೇಕು; 

ಹಾದಿ ಬೀದಿಗಳಲ್ಲಿ ಕ್ರಿಸ್ಮಸ್ ಗಿಡಗಳೆದ್ದು 

ಮುತ್ತುರತ್ನಗಳಂಥ ಬೆಳಕು ತೂಗಿ 

ಕಿಟಕಿಗಾಜಿನ ಹಿಂದೆ ಕಿರಿನಗೆಯರಳಬೇಕು; 

ನೃತ್ಯಗೀತದ ನಲಿವು ಉಕ್ಕಿಹರಿಯಬೇಕು; 

ಮೃದು ನುಡಿಗಳಲ್ಲಿ ಸ್ವಾಗತಿಸಬೇಕು 

ಪ್ರಾರ್ಥನೆಯ ಕೊರಳು ಬಾನತ್ತ ಏರಬೇಕು; 

ಎತ್ತರದ ಘಂಟೆಗಳ ದನಿ ಎಡೆಬಿಡದೆ ಮೊಳಗಬೇಕು; 

ಶಾಂತಿ ನೆಲಸಬೇಕು. 

ಬಯಲ ಹಸಿರಿನ ತುಂಬ ಹೂವಾಡಬೇಕು. 

ಪ್ರೀತಿಯೇ ದೇವರೆಂದು ನೆನೆಯಬೇಕು; 

ಕಣ್ಣಹನಿಗಳ ನಡುವೆ ಕೈಮುಗಿಯಬೇಕು. 

ಕೆ. ಎಸ್. ನರಸಿಂಹಸ್ವಾಮಿ- ಪುಟ - 93 

ಪುಸ್ತಕ :ಕ್ರಿಸ್ತಕಾವ್ಯ